ស្ដាប់ ឬ ទាញយកសំឡេង
ស្ដាប់ ឬ ទាញយកសំឡេង
កិច្ចប្រជុំសភាអនុម័តសេចក្តីព្រាងច្បាប់ចំនួន៣ ពាក់ព័ន្ធនឹងប្រព័ន្ធតុលាការ កាលពីថ្ងៃទី២២ ខែឧសភា ឆ្នាំ២០១៤។
RFA/Yeang Socheametta
ក្រុមការងារចរចារបស់គណបក្សជាប់ឆ្នោតទាំងពីរ បានបញ្ចប់កិច្ចប្រជុំធ្វើវិសោធនកម្មលើបញ្ហាបី រួមមាន៖ ការធ្វើវិសោធនកម្មបទបញ្ជាផ្ទៃក្នុងរដ្ឋសភា ការធ្វើវិសោធនកម្មរដ្ឋធម្មនុញ្ញ និងការធ្វើវិសោធនកម្មច្បាប់បោះឆ្នោត។ ភាគីទាំងពីរព្រមព្រៀងគ្នាលើចំណុចមួយចំនួននៃប្រធានបទទាំងបី ហើយគ្រោងប្រើប្រាស់យន្តការរដ្ឋសភាដើម្បីបញ្ចប់ការធ្វើវិសោធនកម្មនេះ។
ក្រុមការងារចរចារបស់គណបក្សជាប់ឆ្នោតទាំងពីរ បានបញ្ចប់កិច្ចពិភាក្សារបស់ខ្លួនរួចហើយ នៅល្ងាចថ្ងៃទី២៩ ខែកក្កដា។ ក្នុងចំណោមបញ្ហាដែលត្រូវធ្វើវិសោធនកម្មទាំងបី មានប្រធានបទពីរត្រូវបានគណបក្សទាំងពីរព្រមព្រៀងគ្នាជាគោលការណ៍ ដើម្បីប្រើប្រាស់យន្តការរដ្ឋសភាពិនិត្យ និងសម្រេចនៅពេលក្រោយ។ ប្រធានបទនោះ រួមមាន ការធ្វើវិសោធនកម្មរដ្ឋធម្មនុញ្ញ និងការធ្វើវិសោធនកម្មច្បាប់បោះឆ្នោត។
ការធ្វើវិសោធនកម្មរដ្ឋធម្មនុញ្ញ គឺគណបក្សទាំងពីរឯកភាពគ្នាបង្កើតជំពូកថ្មីមួយទៀតសម្រាប់រដ្ឋធម្មនុញ្ញជាច្បាប់កំពូលរបស់កម្ពុជា។ ជំពូកថ្មីនោះ អាចមានពីរឬបីមាត្រា ដែលមានចែងពីតួនាទីស្ថាប័នគណៈកម្មាធិការជាតិរៀបចំការបោះឆ្នោតជាស្ថាប័នធម្មនុញ្ញ ដែលចែងក្នុងរដ្ឋធម្មនុញ្ញ។ ការធ្វើវិសោធនកម្មច្បាប់បោះឆ្នោតវិញ គណបក្សទាំងពីរពិភាក្សាគ្នាដោយលើកយកបួនចំនុច ដើម្បីកែប្រែ ដូចជា ការរៀបចំសមាសភាពមន្ត្រីគណៈកម្មាធិការជាតិរៀបចំការបោះឆ្នោតនៅថ្នាក់ក្រោមជាតិ យន្តការពិនិត្យនិងដោះស្រាយពាក្យបណ្ដឹង ការរៀបចំចុះឈ្មោះអ្នកបោះឆ្នោតថ្មី និងរៀបចំបញ្ជីឈ្មោះបោះឆ្នោត និងប្រធានបទដែលត្រូវលើកយកទៅដាក់ក្នុងអង្គសិក្ខាសាលា ដើម្បីសុំយោបល់ពីភាគីពាក់ព័ន្ធ។
ចំណែកឯប្រធានបទធ្វើវិសោធនកម្មបទបញ្ជាផ្ទៃក្នុងរដ្ឋសភាវិញ គណបក្សទាំងពីរព្រមព្រៀងគ្នាជាលាយលក្ខណ៍អក្សររួចរាល់ហើយ។ ប្រធានបទការធ្វើវិសោធនកម្មបទបញ្ជាផ្ទៃក្នុងរដ្ឋសភា គណបក្សទាំងពីរព្រមព្រៀងគ្នាធ្វើវិសោធនកម្មលើប្រការ ៦ ប្រការ ៩ ប្រការ ១៤ ប្រការ ៣២ និងប្រការ ៣៤។ បទបញ្ជាផ្ទៃក្នុងប្រការ៦ រៀបរាប់ពីចំនួនគណៈកម្មាធិការរដ្ឋសភា ដែលនឹងបន្ថែមគណៈកម្មាការអង្កេតបោសសំអាត និងប្រឆាំងអំពើពុករលួយ បន្ថែមពីលើគណៈកម្មការដែលមានស្រាប់ចំនួន៩។
ប្រការ ៩ថ្មី និយាយពីតួនាទីអនុប្រធានរដ្ឋសភាដែលជួយធ្វើការងារប្រធានរដ្ឋសភាទៅតាមការបែងចែកភារកិច្ច។ ក្នុងប្រការនោះ ចែងថា បើប្រធានមិនបានមកធ្វើការ ត្រូវផ្ទេរសិទ្ធិឲ្យអនុប្រធានសភា ហើយត្រូវធ្វើតាមឋានានុក្រម។ បានន័យថា បើសិនជាលោក ហេង សំរិន រវល់មិនអាចមកធ្វើការបាន នោះភារកិច្ចប្រធានស្ដីទីរដ្ឋសភានឹងធ្លាក់ទៅលើអនុប្រធានទី១ ជាបេក្ខជនមកពីបក្សប្រឆាំង។
ចំពោះប្រការ១៤ វិញ និយាយពីការផ្សព្វផ្សាយបន្ទាប់ពីកិច្ចប្រជុំសភាបទបញ្ជាផ្ទៃក្នុងនេះ តម្រូវឲ្យអ្នកតំណាងរាស្ត្រអាចមានពេល ២០នាទី ដើម្បីរៀបចំសន្និសីទកាសែតដែលកាលមុនស្ទើរតែគ្មានសោះនោះ។ ចំពោះប្រការទី៣២ និយាយពីការសួរដេញដោលមន្ត្រីរដ្ឋាភិបាលក្នុងរដ្ឋសភា។ ចំណុចដែលប្លែកពីអាណត្តិមុននោះ គឺបទបញ្ជាផ្ទៃក្នុងចែងថា ចំលើយរបស់រដ្ឋមន្ត្រី ឬនាយករដ្ឋមន្ត្រីអាចធ្វើផ្ទាល់មាត់ ឬសរសេរជាលាយលក្ខណ៍អក្សរ ហើយចាំបាច់ត្រូវតែចូលមកបំភ្លឺតាមការកោះហៅរបស់អ្នកតំណាងរាស្ត្រ។ ប៉ុន្តែចំណុចដែលមិនកែប្រែនោះ នៅត្រង់ថា ប្រធានរដ្ឋសភាជាអ្នកសម្រេចបើកឲ្យសួរ ឬមិនបើកឲ្យដេញដោល បើសិនណាមិនមានការសួរឬដេញដោលទេនោះ ចម្លើយរបស់មន្ត្រីរដ្ឋាភិបាលចាត់ទុកជាការបិទបញ្ចប់សំណួរតែម្តង។ ក្នុងប្រការទី៣៤ ជាប្រការចុងក្រោយដែលធ្វើការកែប្រែនោះ បញ្ជាក់ថា បើគណៈកម្មការជំនាញណាមួយកោះហៅមន្ត្រីរដ្ឋាភិបាល ឬវរជនណាមួយមកបំភ្លឺ អ្នកនោះចាំបាច់ត្រូវតែចូលបំភ្លឺ។
មន្ត្រីអ្នកនាំពាក្យរដ្ឋសភា និងតំណាងរាស្ត្រគណបក្សប្រជាជនកម្ពុជា លោក ឈាង វុន មានប្រសាសន៍ថា ការធ្វើវិសោធនទាំងអស់ជាគំនិតរបស់លោកនាយករដ្ឋមន្ត្រី ហ៊ុន សែន ដែលចង់ឃើញដំណើរការជជែកក្នុងរដ្ឋសភាកម្ពុជា កាន់តែផុលផុសថែមទៀត។ លោកបន្តថា បញ្ហាទាំងអស់នឹងអាចដោះស្រាយបានដោយការប្រើប្រាស់យន្តការរដ្ឋសភា៖ «ចាំបាច់ត្រូវអនុវត្តគោលការណ៍ចូលរួមរវាងគណបក្សសង្គ្រោះជាតិ និងគណបក្សប្រជាជនកម្ពុជា ត្រូវដោះស្រាយឲ្យបានក្នុងសភា»។
រីឯមន្ត្រីអ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បញ្ជាក់ថា គណបក្សទាំងពីរព្រមព្រៀងគ្នាលើការធ្វើវិសោធនកម្មមាត្រាមួយចំនួននៃរដ្ឋសភាមែន ប៉ុន្តែក៏នៅមានចំណុចច្រើនទៀតដែលត្រូវបន្តជជែកគ្នាបន្ត។ លោកបន្ថែមថា រដ្ឋសភាត្រូវតែជាស្ថាប័នដែលពលរដ្ឋជឿទុកចិត្ត៖ «យើងបានពិភាក្សាគ្នាច្រើនពីបញ្ហានេះ ហើយរឿងមួយចំនួដូចជាសេចក្ដីស្នើច្បាប់ ឬសេចក្ដីព្រាងច្បាប់ហ្នឹងត្រូវតែពិភាក្សាឲ្យបានទូលំទូលាយ»។
ក្រុមការងារចរចារបស់គណបក្សទាំងពីរ នឹងបន្តពិភាក្សាគ្នាពីបញ្ហាវិសោធនកម្មរដ្ឋធម្មនុញ្ញ និងវិសោធនកម្មច្បាប់បោះឆ្នោតនៅដើមសប្ដាហ៍ក្រោយ។ មកទល់ពេលនេះ គណបក្សប្រឆាំងមិនទាន់កំណត់កាលបរិច្ឆេតចូលទៅស្បថក្នុងវាំងនៅឡើយទេ៕
1 comment:
I think CNRP is right , they need to make sure that all the problem and rules of the assembly is complete and delight before go to swear in . Don't be hurry need time to have a sure and precise law change and adopt first .Because if you all swear in before some argument of change is not complete , they can play game with you . congratulation to all of you ,who help change for better live of ours Khmer people and our country .
Post a Comment